2015年1月29日 星期四

我年紀唔細,點算好?


所謂年紀唔輕,我是指年齡介乎3645的熟齡女性。根據多年配對經驗,這個年齡群組的女性傾向選擇40歲或以上的男生做伴侶,但年齡介乎40至要50歲的男性卻會選擇找36或以下的女性為伴侶,很明顯出現供不應求的情況。

這個情況似乎很難改變,熟齡姊妹要突圍而出,從困境中找到出路也不是沒有辦法,只是大家要捬心自問:「我為左搵個好老公,可以去到幾盡?」

正所謂良好態度才是王道,熟齡女性一定要願意改變自己固有的想法及行為模式。這是鐵律,也是令熟齡姊妹最感困擾的。無他,大家都生活了這麼多年,平時樸素不打扮,當被要求去理髮添新衣,竟然也會不高興,覺得自己去到現在這個年紀還要「討好」男性。

每當我聽到這些類似「討好」的字眼,只會覺得這比講粗口還要難聽!假如妳想搵個好伴侶,請先懷有一個健康的兩性相處態度,假如閣下感到很屈就,那麼請三思婚姻是否真的適合妳,既想結婚又不想改變自己遷就他人,這樣就是緣木求魚,抱著這種心態的女性很難遇上適合妳的男生呢。

有了良好態度,下一步就是切法擴濶生活圈子,透過接觸大量男生,從中篩選可以發展的對象,大家可以試試以下方法:

1. 嫁個老外
根據近年人口調查顯示,香港男女比例的差距越來越大,男少女多的情況日趨嚴重,在香港要遇上理想對象越發困難,香港女性似乎向外尋找姻緣已是大勢所趨。為什麼不到中國去找,而要嫁到外國去?無他,因為外國人對年齡的接受程度遠高於華人,熟齡姊妹能夠交上年紀相約的老外的機會較多也較大。

2. 參加興趣班
熟齡姊妹宜好好規劃時間,善於利用空閒時間參加不同的興趣班,於玩樂中認識新朋友,即使未能結識適合的男生,也享受活動的樂趣。同時建議大家參加一些多男生的活動,如各式運動,主動到有男生的場合去,增加遇上Mr. Right 的機會。

3. 善用Online 結識男生
大家都奇怪究竟香港男生都跑到哪兒去?答:網上世界。因此如果你想找到男生,到網上的Dating 世界中,妳將會接觸到許多男生,那時的問題不再是沒有男生,而是男生太多,你需要懂得分辨哪些是合適可發展對象!

Terry, 你的Love Coach

2015年1月27日 星期二

男神也結婚!?



娛樂圈中男神首肯婚結,
往往都會備受注目,
今次就輪到周杰倫啦!
周董同女友昆凌响118日,
即係佢36歲嘅日子踏入人生另一階段,見到一對新人童話式嘅婚禮,
真係羡煞旁人呀!



我睇左好多篇有關呢個婚禮嘅報導,
其中有篇提到促使周杰倫結婚嘅關鍵,
原來係女友响佢病嘅時候,
對佢細心嘅照顧與關懷,
呢個情境令周董十分感動,
也想起拍拖這些日子以來,
女友為了這段感情的各種付出,
所以便想到結婚!
雖然周董同昆凌也是藝人,
但要做周董身邊的女人都真係唔容易,
處處都是壓力,
昆凌嘅付出能夠得到男朋友嘅肯定
對於女方黎講真係意義重大。

許多拍拖一段時間嘅女生都心急結婚,
無奈有時候男生唔急女生急,
但又覺得結婚呢d野梗係由男方先提出啦,
咁都有道理嘅,
如果雙方都有意思結婚,
其實拍拖兩年到都差唔多結婚架啦,
咁當然無一個所謂最佳日子。
但係如果男方一直對結婚隻字不提,
又或一年推一年,
又或者同妳講:「我地而家咁唔好咩?結婚只是一張紙。」
諸如此類,咁妳都醒目啦,
佢好可能係無腳嘅雀仔,
甚至可能係已經有巢落腳嘅雀仔。
如果妳係一心想搵人結婚,
咁就小心果d嘆慢板嘅男生啦,
費事浪費大好青春。

對於好多姊妹黎講,
要佢地同「拖拉男」分手係好困難,
因為分左手又未必一定搵得返新男友,
但個男生又習慣左而家拍拖嘅相處模式,
真係唔知邊個先至係對方嘅「雞肋」,
分手唔敢,唔分手但又結唔到婚,
似乎兩樣都唔係自己想要嘅野。
老實講,用兩年去了解一個人係咪適合
自己嘅結婚對象,
真係好夠架啦,
奉勸各位身邊有個「拖拉男」嘅姊妹,
要同男朋友商量一下,
如果大家响結婚上未能取得共識,
就要認真思考一下大家係咪要繼續呢種關係。

不少愛情長跑多年嘅情侶,
最後雖然結左婚,
但不少响新婚12年內離婚,
原因係因為男方唔想做衰人,
覺得拖左女友78年,
連自己都唔好意思講分手,
咪唯有結婚囉,
但畢竟大家感情已經由濃轉淡,
結婚只屬略盡綿力完埋個故仔,
無人話結左婚唔離得婚架麻,
所以照擺「大龍鳳」,
當做完成左階段性責任,
之後理直氣壯咁離婚。
離婚再婚這回事,
從來對男人黎難度唔太高,
反而女人離婚再婚嘅成本好高,
請身邊有個「拖拉男」嘅姊妹,
無論之後係咪結婚,
都要小心三思而後行呀!
最重要係翻返去源頭,
看看妳地段感情有無問題。

Joe, 你的 Love Coach

2015年1月23日 星期五

男人心中的「靚女」




「我樣子一般,又真的遲了起步,該怎樣辦?」

相信這是一個不少年過40的女性,一直藏於心底的一個問號。上回說到男生都愛靚女,可能已經令不少女生唔高興,且慢!女生們不用馬上聯想娛樂圈中靚女如官欣娜、謝安琪……

對於自身條件一般,即處於中游位置的男生,他們所要求的靚女,其實並非「風頭躉」或「萬人迷」,男生對絕色佳麗一向抱只可遠觀的觀望態度,反而他們希望女友有以下特點,這樣就已經是他們心中的「靚女」:


1.     笑容甜美
2.     眼睛迷人明亮
3.     薄施脂粉
4.     髮型整齊時尚
5.     身材苗條
6.     姿態神情女性化
7.     衣著打扮時尚

男生看女生是從以上各方面去衡量而得到一個整體的印象,他們很少只打量你的臉孔五官。可惜不少熟齡女性會忽略外型打扮,可能大家在尋找感情的路上早已有點厭倦,往往很容易放鬆個人打扮 ,反而會要求男性降低對女性的要求,這似乎有點本末倒置。其中有幾項常犯地雷,熟齡姊妹實在不可不知:

1.     髮型:許多女性忽視髮型的重要,由於工作忙碌而鮮有打理頭髮,髮型長年保持不變,欠缺整理,髮絲蓬鬆,欠缺光采,如此這般都令男士卻步。一個修飾過的髮型能令你感覺年輕、時尚,最重要讓男生知道妳願意花時間照顧自己的儀容。

2.     身材:現時情況已經不是要求姊妹們身材出眾,而是不少女性的身型已經過胖,無錯,是過胖!當妳跟男生同行時,妳的身體比他要大出一個碼那種,這樣很難激起男生想保護照顧妳的想法,而且身型過胖也很難把衣服穿得好看,也會傾向選擇黑白藍灰等欠缺吸引力及熱情的衣服。

3.     姿態情神:熟齡姊妹由於生活經歷較豐富,不少在公司任高職,行事態度及作風早已比不少男性還要「男性化」,打扮當然是專業而傾向中性,談吐及神態一般較正經,由於習慣了這個模式,即使約會交友,仍然以對待工作的態度去對待男性朋友,這樣妳只會結識到視妳如「兄弟」的男生,卻不能令男性想追求妳。

4.     衣著:上班有上班服,約會有約會裝束,熟齡姊妹即使年紀稍大,在悉心打扮下仍然會明艷照人,可惜姊妹們一般只會在真的跟心儀男性約會才打扮,有些甚至連去飲喜酒都穿得像上班,實在很難吸引異性。有更甚者只穿褲子而不穿裙子,原因是行路唔方便!款式老土也很嚇人,因為已經不是年輕,衣服款式老土會令妳看起來年紀更大,對自己百害而無一利。

不少熟齡女性會抱怨工作已經很辛苦,哪有心機及時間去打扮?其實在各位姊妹的角度而言,這些原因似乎很合理。然而,妳因此而希望搵老婆的男性「體諒」妳卻實在是一種無理要求呢!

緊記:如果男生不能夠對大家的外表產生興趣,是很難進一步發掘大家的內在美。其實熟齡姊妹更要加把勁打扮自己,無論是否有人追,起碼自己打扮漂漂亮亮也是一件賞心樂事!

下一回:年紀唔輕,點算?



Terry,你的Love Coach

圖片來源:
Copyright: <a href='http://www.123rf.com/profile_samotrebizan'>samotrebizan / 123RF Stock Photo</a>

2015年1月19日 星期一

也說心動




近年香港樂壇猶如一池死水,
已經很少製作能夠引起話題,
反而大家都關注國內音樂節目《我是歌手3》,
是次有香港歌手古巨基參加,
重有星架坡國寶級歌手陳潔儀,
而陳潔儀重要係第2 round 出局,
令許多香港大跌眼鏡!

今次我唔係想談論陳潔儀被叮出局合唔合理,
而係因為佢被叮走,
令我好有趣興走去youtube 聽返佢選唱果首《心動》!
老實果句,我無聽過其他歌手唱成點,
但陳潔儀真係唱得委婉動人,
唱出左女性對舊愛的回憶,
及那份念念不忘嘅情懷!

不過,這種對舊愛久久不忘嘅「心動」,
聽起來係就係好浪漫嘅,
之但係如果真係發生响現實生活中,
有女仔將ex 放响心裡,
同佢雖然分左手,
但係你重好掛住佢,
比佢佔據你嘅心空間,
以致影响你以後同其他男生嘅發展,
咁就…… 一d 都唔浪漫囉!

歌詞最後話:
「 總是想再見你 還試著打探你消息
原來你就住在我的身體 守護我的回憶」
哇!老老實實,
女仔重想去打探自己個ex 消息,
响現實之中係好普遍。
其實要打探一d 都唔難,
尤其而家有facebook ,
大家又有common friends,
就一定會見相呀status 呀咁,
重會為到佢嘅post 而影响自己情緒。

我明白每個人失戀都要一段時間去過渡,
對舊愛仍然好留意係人之常情,
但如果當呢d 行為持續1年以上,
咁就真係要正視一下自己嘅情緒同埋心態啦!
點解自己會咁?
係因為唔捨得佢?餘情未了?
定係為左睇下佢有無新女?想乘機反tat ?
又或係怕佢比自己早結婚?
無論咩原因,
請小心處理及呵護自己嘅需要,
因為比一個已經唔在乎你嘅人繼續影响自己,
真係好唔抵同埋好無謂。

黎搵我處理感情問題嘅女仔,
佢地都會講下自己嘅戀愛史,
唔少女仔條件唔差,
但就係衰响個ex 手上:
ex 條件太好,女仔覺得以後遇上嘅男生都唔及佢、
比個ex 飛而感到自尊受害,覺得自己無人愛、
放唔低個ex ,仍然深愛對方而無法展開另一段感情、
認為愛情太苦、以後不敢入情關……
有時呢d 諗法會令d女仔响情路上一籌莫展,
不知不覺間錯過多少情緣、又虛渡多少青春?

人要向前看,
留在回憶之中會令你不能好好投入活在當下,
心動的一刻既已成過去,
享受過就好了,要走的就讓他走吧,
如能讓過去的經驗轉化為正能量,
幫助自己成為一個更好嘅人,
咁就已經無悔無憾啦!

Joe,你的Love Coach

2015年1月15日 星期四

男人都在搵什麼





當女生們都為著自己的終身幸福而著緊,正忙著如何提升自己的條件時,不妨從男生的角度思考一下,正所謂「知己知彼,百戰百勝」,這種態度也適用於愛情之上。



第一位:漂亮


外在美不單止是男生對女伴的要求,其實反之亦然,多少女生拒絕跟某某男生約會時,最普遍的原因都是嫌棄對方樣子「唔合眼緣」、「感覺唔係好夾」、「唔係我喜歡果type」等,我不是質疑大家的直覺,而是想解讀這些字眼背後的真正意思,不就是「唔夠靚仔」嗎?正所謂各花入各眼,男人眼中的「靚女」都有唔少類型,但大前提要「漂亮」是沒有讓步的餘地。妳可能會疑惑身邊一些不修邊幅、外型老古、不擅辭令的男生怎麼都繼續單身?妳以為只要是單身姊妹願意接受他們,他們便會照單全收?妳以為他們會根據自己的外貌降低自己的擇偶條件?那你實在太一廂情願了,也真的不了解男生的想法。現實是:無論男生自己的樣子有多不濟,他們會堅持等待「漂亮」的女生做女朋友。


這種側重追求「漂亮」的風氣在華人社會的情況是比較嚴重的,其實要明白也不怎樣困難。香港男生都愛面子,有個靚女友自然可以於社交圈子中Show off ,自己也忽然「升格」了。即使妳有多麼不認同這種英雄心作祟,連交女友都講呢D,但也要明白香港男生都似乎希望透過結識「靚女友」而獲得滿足的心理需要。


第二位:年輕


娶妻求年輕,這不是什麼新鮮的觀點,但不知怎的,姊妹們就是接受不了,口雖說明白男生的心態,但心中卻會埋怨男生只愛青春少艾。眾所周知孩子當然是趁嫩生,這個考慮大家不可不知。香港女生在工作與愛情之間,往往會選擇了先工作後愛情,求學時期(尤其大學階段)錯失物色結婚對象的時機,隨後便被忙碌的工作弄得沒有時間拍拖,於是一拖就108載,人到中年才醒覺自己的感情需要:原來自己如何熱愛工作都好,始終都想拍拖結婚生孩子。什麼?假如這是心聲,怎麼不一早就開始去搵?須知道年齡呢回事,不是妳說逆轉便逆轉,我就眼見不少姊妹因工作太辛苦,樣子殘之餘,臉上鮮有笑容,似乎趕客多點。


男生揀老婆其實比女生簡單,男生們的思路也是有跡可尋。既然男生喜歡漂亮女生係面子尤關,那麼同一邏輯之下,男生愛年輕女生也是可以理解。香港男生一般不太苛求女伴要懂讀心術,妳一知半解更好,他反而覺得應付妳是游刃有餘,乘機表現一下自己不是更好嗎?可惜香港女生都不太肯為男生提供舞台,愛情裡,有時妳越要贏就輸得越徹底。


其實對於男人擇偶的心態,女生並非完全無知,但少不免有點偏頗,許多時會選擇性接受。尤其是有信仰的女生,她們總是認為返教會的男生是例外,以為這些有信仰的男生對女生的要求較「不世俗」。


請捬心自問:妳希望遇上「例外」,是因為在妳的經驗裡,男生都不追求漂亮、年輕的女生?還是大家都有點自我,不想「迎合」男生的要求。有時甚至有點懶惰,搵得辛苦了,倒不如把精力放在工作,正所謂「一分耕耘,一分收穫」,似乎工作的回報比搵老公更實在、更可以控制喎!


不是說「漂亮、年輕」是鐵律,只是這兩項都是香港男生普遍的心態,加上現時社會男少女多,由於有得揀,男生們更不急於一時三刻,令他們更加堅持去等,等待終有一天搵到一位年輕貌美的女生。

有姊妹會問:我樣子一般,又真的遲了起步,該怎樣辦? 

這是一個很正面的問題,等我下回分解。

Terry
你的Love Coach


相片來源:
Copyright: <a href='http://www.123rf.com/profile_osons'>osons / 123RF Stock Photo</a>

2015年1月13日 星期二

其實佢係咪喜歡我




剛剛跟M小姐做完單對單的coaching,
佢凳都未坐暖,劈頭第一句就講:
Joe,佢突然又响whatsapp 出現翻,
重約我食飯……
呢種開場白我都聽過無數次,
姊妹們心果句其實係想我幫佢證實自己的預設:
佢係喜歡我
雖然大家都以一個問題黎包裝:
「其實佢係咪喜歡我?」

「其實佢係咪喜歡我?」
一個從出生以來、大家都會唔止問過一次嘅問題,
答案比任何小說同埋電視劇重要吸引,
同埋撲塑迷離!
幾乎所有問題少女都只係想弄清楚個答案,
最好梗係中埋自己心果句: 佢係喜歡我
然後就可以安心疊埋心水同佢發展,
唔係再終日忐忑不安咁。
呢個結局無話好唔好,
問題在於姊妹們都太過目標為本,
只重視「喜歡」、「唔喜歡」嘅結果,
許多時會忽略左一d比「喜歡」、「唔喜歡」更重要嘅事情。

妳喜歡佢嗎?
妳鐘意佢d咩?
妳同佢whatsapp 傾d咩?好唔好傾?
你地有無見過面、出過街?
試試問以上問題,代替「其實佢係咪喜歡我?」,
有時大家都急於得到答案,
覺得要先搞清楚左呢個問題,
才可以決定係咪出街或者再有進一步溝通,
Sorry,呢個前設好明顯係姊妹們一廂情願嘅諗法,
同時重係一個思想「陷阱」,
因為「其實佢係咪喜歡我?」呢條問題,
係一個令妳無視自己真正需要嘅問題,
你關心嘅係對方嘅心意,
但就忽略左自己係咪適合同對方一齊,
似乎妳只係被動地接受對方:
只要okay ,我就okay!
Reaaly???係咪真先?妳係咪真係佢肯妳就啃先?

妳一定會辯護:咁點都要搞清佢係咪喜歡自己架喎……
妳無錯,係要搞清楚!
錯就錯在妳太心急、
錯在本末倒置,
只求結果先決定是否付出!
要確定對方係咪喜歡自己、
而自己又係咪都喜歡佢,
呢個係一個「過程」,
而唔係一個答案黎㗎,
妳一定要以身犯險,
妳必須親身上陣,
妳必須要去體驗、去體會,
食過檸檬表錯情,
咪知道佢喜唔喜歡妳囉。
食過飯傾過下計,
妳咪知自己同佢啱唔啱feel 囉。
要搞清楚「其實佢係咪喜歡我?」
係無捷徑架,同埋無得請人代理架。
即使妳去找婚介公司,
佢地都係幫妳收窄個搵伴侶嘅範圍,
但同人見面、同埋feel 下夾唔夾,
都只能夠自己親身上陣。
這,就是愛情痛苦之處,也是迷人之處!

Joe
你的Love Coach

圖片來源:

Copyright- <a href='http-//www.123rf.com/profile_imagevectors'>imagevectors / 123RF Stock Photo</a>

2015年1月9日 星期五

搵老婆外表唔係最重要!?




近日網上常常見到朋友轉發一位日本女生化妝前後的貼子,由於樣子大太分別,以致被國內國外瘋傳。看過女生的容貌,我懷疑她是有預謀利用自己的樣子去虎嚇別人,假如她不公開如何由素顏化妝至美女的過程,我只認為其實無論妝前妝後都是造假而已。

再看貼子內容,竟然還有人提出「 搵老婆外表唔係最重要!?」這個不老的傳說,難道這個神話還有人相信的嗎?我相信有這樣想法的人,十之八九是女生美麗的誤會,否則就是男生違心的謊言。

假如眼前有兩位女生,兩個一樣善良溫柔貼體加善解人意,但一個樣子不合眼緣,俗稱「無feel」(一般男生對不夠漂亮的女生的描述);另一位笑容甜美、瞇著大眼睛、身材嬌小、衣著有品味,細看五官分明就是小美人。作為男生的你會點揀?又或女生們暫時借男生的腦袋思考一下,你會更想接近誰?

當然,所有情況都有例外,但這個例外通常都是佔總人口的少數,所以一心搵認為「 搵老婆外表唔係最重要!」的男生做老公的女生,如果想提高搵到Mr.Right 的機會,還是把心力投放於主流人口比較實際,即是好好經營妳的外表。

所謂好好經營自己的外表,不是說要穿金戴銀,名牌都往身上堆這種俗氣女生,而是懂得及願意花時間照顧自己的儀容,讓別人都見到妳是個外表跟這個時代接軌的聰慧女生!

說回化妝,不少女生抗拒化妝,除了懶惰之外,就是太匆忙。建議大家要麼做好前期保養護膚,要麼就得學後期工夫,不是說PS那種後期,而是懂得把樣子化得自然醒目那種,化妝技巧都有高低之分,那個日本姑娘正是反面教材。

Terry
你的Love Coach

2015年1月6日 星期二

單身係一種身份危機




呢個年頭,
談論女生仍然單身嘅文章,
隨時多過好多學術話題嘅論文,
似乎女生們都知道自己單身有因。
順手拈來的,
不外乎係港女事業心重勁過男人、
三高搞到男人唔敢追、
男生返大陸過台灣搵溫柔美女……
如果要數其實重可以數落去,
一堆堆似是而非嘅講法,
真真假假已經唔係重點,
但明顯係置香港女性於一個不利位置。

就解決問題的角度黎講,
坊間對Why 的討論其實都真係幾充份,
但無奈對How 的關注則
採取一種掫揄、冷眼的態度作回應,
你說香港真係男女平等嗎? 
假如平等唔單指收入的數字遊戲,
而是對女性及男性同等地尊重,
那麼其實香港女性要自在地保持單身,
不用承受社會傳統身份的約制及壓力,
姊妹們跟這個「境界」
依然存在天壤之別。

曾經聽過多位未婚而又恨嫁
姊妹認真咁分享,
話寧願返翻去盲婚、一夫多妻的時代,
要自己搵老公真係太辛苦,
唔夠男人咪同人共侍一夫囉,
講嘅時候佢地好冷靜,
重話真係諗左呢種婚姻制度好耐。
是一時戲言也好,
是搵折充方法也好,
令我明白到「已婚」
這個身份對女性的意義。

要姊妹們辭職唔做走去搵老公,
甚或只係開少幾晚OT都已經屬死諫級建議,
那麼最可行嘅方法係:
後生女唔該早d開始去搵老公,
中女唔該學下玩fb同埋online dating
而無論咩年齡,
都請妳明白「愛情」係要冒險無話一take 即過,
更加無一種約會係一定成功,
稍稍放低攻利的計算,
學習好好享受一次單純的約會,
無論感情往咩方向走,
係享受嘅一刻妳已經賺左架啦!

Joe
你的Love Coach

2015年1月4日 星期日

人在江湖,愛不由己?


同份工結婚

對不少單身人士來說,單身生活與個人情緒本來相安無事,明明星期一至星期日都公務繁忙,連晚飯都可能是半公半私的business dinner,哪還有空閒去煩惱個人感情需要?

說到底還不是大時大節,親朋戚友的例牌「問候」,再加上各大小消費品的廣告的推波助瀾?在多番被提醒之下,你會突然記起自己單身,原來夜欄人靜,四野無人時,你仍然會感到一點點孤單。這,也許是人之常情吧……

問題是,大家都喜歡在大時大節許下「新年願望」、訂下新一年的「搵老婆」「搵老公」大計,無錯,有計劃是好事,也是必須要做的事。然而,撫心自問一下,多少美麗的大計是有頭威無尾陣?如果計劃只是無了期停留於計劃階段,那麼你只會原地踏步呢。

做了這麼多年Love Coach ,其中一個見得最多的情況是:單身姊妹及弟兄知道自己的感情需要,也明白需要把計劃實踐,無奈苦無時間。原來當你人在江湖就必然地身不由己,大家似乎已經同份工結左婚呢!

騰出空間準備愛

當你新一年立志,比自己的感情生活一個生機,最重要的是有心理準備要過一個不一樣的生活模式,即是意味著你要重新分配時間。

重新分配你的時間,劃出時間及空間,好讓你有心力及時間去尋找伴侶,以及發展栽培感情。這個年頭,「宅男」「宅女」多的是,假如大家都習慣了既定的生活模式,如果要轉變實在是需要時間去調整,這個調整包括心態及行為兩方面;所以,不要低估當中的難度啊!

鼓勵大家趁著2015年的1月仍然新鮮滾熱辣,好好正視自己的感情需要,訂定計劃時,緊記重新分配你的時間,有需要時作出調整,令「搵老婆」「搵老公」的大計劃可以落地實行。

Terry
你的Love Coach

2015年1月1日 星期四

姊妹好像沒人追?



姊妹好像沒人追


但一直身邊有好些單身異性朋友時常接觸。其實會否是襄王有心,神女無夢呢?

我必須要先向姊妹們透露一個玄機:當男人對女人有好感並有意"APPROACH"對方時,其實很少單刀直入,立即表白。理由一是他們認為「時候未到」,雙方還需了解;其二是男人都會怕「瘀」,不想「食檸檬」(即被拒絕)。所以,男人一般只作一點點主動以示好感,等待對方回應才進一步追求。

然而,姊妹們有時敏感度真的太低了,例如有異性朋友不時很有「風度」接送姊妹回家,或閒時相約妳「單獨」食飯,姊妹卻完全感受不到別人的心意,無動於衷。其實感情建立,就如打網球一樣,一方發了球,對方若不接球作回傳,球賽怎能開始呢?

「回傳?我可以如何回傳?」姊妹問。方法其實很簡單,例如異性一而再請妳食飯而不願收妳錢,除了多謝,妳可提出下次再食飯由自己請客。 又例如若無法應約二人進餐,為表示妳非存心拒人千里,可主動建議另一時間再聚。

男仕表示好感的方法有很多種,女仕的回應更是千變萬化。如果妳自覺敏感度低,請多多學習和練習啊!

Joe, Your Love Coach.