愛情，從來都不是等回來的！

身邊有搵老公/老婆需要的兄弟姊妹很多，有些看起來對尋找伴侶漫不經心，你以為他/她已經不食人間煙火，細問之下，原來是另一個故事。

A小姐喜歡上公司一位男同事，但仍未搞清楚他是否單身、是否對自己有好感、個性是否跟自己夾得來等等。由於太多未知數，我還以為他是她的新同事，卻原來二人已經工作了一段頗長的時間。

究竟A小姐怎麼可以維持這種狀態？既不放棄也不進取的一種含糊關係，其實這是很虛耗心力及時間。

這種暗戀真的害人不淺，但有人就是喜歡在自己頭上製造雲霧，日子添加了這些單方面的曖昧似乎不致於太乏味吧！可是實際上這種等待也太奢侈了，A小姐什麼也沒有做，沒有弄清楚對方是否單身已經大錯特錯，也沒有留意對方是否對自己有好感，亦沒有嘗試過吸引意中人。A小姐的情況似乎是一種病態沉溺多一點，因為最美的東西都只是她的幻想而已，我估計她從沒有想過真的可以成為那男生的女朋友，她只是在編織一個夢而已。

你大概會以為A小姐是個虛擬人物，我告訴你這是真有其人的，有人就是不相信有男生會真的喜歡自己，所以只會躲閃一旁，偷看也快樂。那麼有沒有這種男生？當然也有，現在的男生有些宅得很，即使喜歡上某位女生都不動聲色，結果當然是食白果，得到鑽石王老五之美名。但我相信A小姐及宅男都是有苦自己知的。

如何把渴望及需要變為可能達成的目標？

我相信這是一眾追尋幸福婚姻的男女必須思考的。愛情，從來都不是等回來的！你可能會列出一些男女，他/她們只是偶遇自己的伴侶，怎麼自己卻要花那麼多力氣去搵老婆老公？

佳偶天成不是沒有的，你要等運到也是沒有人會責怪你，只是那些看似什麼也沒有做的男女，其實就已經具備了吸引異性的元素，只是你以為自己跟對方等起平坐而已。與其守株待兔，何不試試主動出擊，追回浪費了的時間？

By Terry, 你的Love Coach


圖片來源：

Copyright: <a href='http://www.123rf.com/profile_imagevectors'>imagevectors / 123RF Stock Photo</a>

美女都靠介紹人！

前幾日睇娛樂版，

喜見胡杏兒同40歲才俊拍拖，

而且兩人大方公開承認對方情侶關係，

真係羡煞旁人呢！

再睇埋報導先知，

原來胡杏兒係透過「朋友介紹」識到現任男友。

點解我要用引號引起「朋友介紹」四個字？

莫非呢個方法有咩新意！？

正所謂方法唔怕舊，

最緊要係work，

其實女生想識男友，

搵朋友介紹、幫手真係very good ar！

呢個方法可以話係好傳統，

有唔少女生覺得呢種方法好老土。

大部分唔肯搵朋友介紹嘅原因，

萬變不離其中，

包括左第一位嘅：唔好意思開口。

簡單黎講係面皮薄過紙，

怕比人知道自己需要男人係好無面嘅一回事。

我衷心奉勸各位怕羞嘅姊妹，

究竟面子重要定係男友重要？

其實呢個年頭，

一般人都唔太自告奮勇咁做雞仔媒人，

因此如果妳唔講，

人地係唔會咁主動幫妳，

甚至怕影响大家之間嘅友誼，

相反只要妳主動去搵人幫手，

雖然未必即時有好介紹，

但都會幫下眼。

其次，係好多女生原來無咩朋友，

你無聽錯，係無朋友！

我見過唔少女生話畢業後開始工作，

已經無同同學聯絡，

而家只顧工作，

仇家就有一堆，

而且係絕對唔會比同事知道自己野，

咁樣你話佢無朋友真係會成立㗎！

香港女生苦幹工作的指數好勁，

但真係唔好搞到連朋友都無，

其實你唔識得去keep 住友誼，

都反映左你未必能夠好好去發展一段感情，

需知道情侶好多時都係由朋友開始做起，

就算係參加speed dating 都好，

你都只係買個結識朋友嘅機會，

至於點樣發展到做情侶，

都要用上一般交朋結友的能力架！

重有一種係以前求求奇奇

開玩笑式叫過朋友介紹，

點知見人地無咩反應就唔再叫，

咁樣做好明白顯係怕尷尬嘅變奏版啦。

人地以為你講笑，

也不當作一回事，

你响咁嘅情況下放棄係好唔抵！

倒不如學習一下點樣請人幫手，

選擇適當嘅時機同場合，

最重要係搵「對」的人做介紹人，

咁樣先可以事半功倍！

有一樣野不得不提，

如果妳想得到朋友嘅幫肋，

請務必扮靚D、培養溫柔、善解人意、有愛心等美德，

因為朋友都會睇下女生嘅質素，

覺得能夠成功推介嘅機會有返咁上下高

先會冒住做雞仔媒人嘅風險幫妳。

你知啦，做媒人呢家野要負責任架，

所以你也要做好預備功夫，

自己準備就緒先好開口，

當然少不得幾張

見得下人嘅相片啦！

其實如果大家用正面、健康嘅心態

看待搵朋友介紹呢種方法，

其實佢嘅成功率都幾高架，

大家不妨趁住就黎新年，

同d好朋友聚舊時順便叫朋友幫下手，

好可能你會有意外驚喜呢！

Joe, 你的Love Coach

我年紀唔細，點算好？

所謂年紀唔輕，我是指年齡介乎36至45的熟齡女性。根據多年配對經驗，這個年齡群組的女性傾向選擇40歲或以上的男生做伴侶，但年齡介乎40至要50歲的男性卻會選擇找36或以下的女性為伴侶，很明顯出現供不應求的情況。

這個情況似乎很難改變，熟齡姊妹要突圍而出，從困境中找到出路也不是沒有辦法，只是大家要捬心自問：「我為左搵個好老公，可以去到幾盡？」

正所謂良好態度才是王道，熟齡女性一定要願意改變自己固有的想法及行為模式。這是鐵律，也是令熟齡姊妹最感困擾的。無他，大家都生活了這麼多年，平時樸素不打扮，當被要求去理髮添新衣，竟然也會不高興，覺得自己去到現在這個年紀還要「討好」男性。

每當我聽到這些類似「討好」的字眼，只會覺得這比講粗口還要難聽！假如妳想搵個好伴侶，請先懷有一個健康的兩性相處態度，假如閣下感到很屈就，那麼請三思婚姻是否真的適合妳，既想結婚又不想改變自己遷就他人，這樣就是緣木求魚，抱著這種心態的女性很難遇上適合妳的男生呢。

有了良好態度，下一步就是切法擴濶生活圈子，透過接觸大量男生，從中篩選可以發展的對象，大家可以試試以下方法：

1.　嫁個老外

根據近年人口調查顯示，香港男女比例的差距越來越大，男少女多的情況日趨嚴重，在香港要遇上理想對象越發困難，香港女性似乎向外尋找姻緣已是大勢所趨。為什麼不到中國去找，而要嫁到外國去？無他，因為外國人對年齡的接受程度遠高於華人，熟齡姊妹能夠交上年紀相約的老外的機會較多也較大。

2.　參加興趣班

熟齡姊妹宜好好規劃時間，善於利用空閒時間參加不同的興趣班，於玩樂中認識新朋友，即使未能結識適合的男生，也享受活動的樂趣。同時建議大家參加一些多男生的活動，如各式運動，主動到有男生的場合去，增加遇上Mr. Right 的機會。

3.　善用Online 結識男生

大家都奇怪究竟香港男生都跑到哪兒去？答：網上世界。因此如果你想找到男生，到網上的Dating 世界中，妳將會接觸到許多男生，那時的問題不再是沒有男生，而是男生太多，你需要懂得分辨哪些是合適可發展對象！

Terry, 你的Love Coach

男神也結婚！？

娛樂圈中男神首肯婚結，

往往都會備受注目，

今次就輪到周杰倫啦！

周董同女友昆凌响1月18日，

即係佢36歲嘅日子踏入人生另一階段，見到一對新人童話式嘅婚禮，

真係羡煞旁人呀！

我睇左好多篇有關呢個婚禮嘅報導，

其中有篇提到促使周杰倫結婚嘅關鍵，

原來係女友响佢病嘅時候，

對佢細心嘅照顧與關懷，

呢個情境令周董十分感動，

也想起拍拖這些日子以來，

女友為了這段感情的各種付出，

所以便想到結婚！

雖然周董同昆凌也是藝人，

但要做周董身邊的女人都真係唔容易，

處處都是壓力，

昆凌嘅付出能夠得到男朋友嘅肯定

對於女方黎講真係意義重大。

許多拍拖一段時間嘅女生都心急結婚，

無奈有時候男生唔急女生急，

但又覺得結婚呢d野梗係由男方先提出啦，

咁都有道理嘅，

如果雙方都有意思結婚，

其實拍拖兩年到都差唔多結婚架啦，

咁當然無一個所謂最佳日子。

但係如果男方一直對結婚隻字不提，

又或一年推一年，

又或者同妳講：「我地而家咁唔好咩？結婚只是一張紙。」

諸如此類，咁妳都醒目啦，

佢好可能係無腳嘅雀仔，

甚至可能係已經有巢落腳嘅雀仔。

如果妳係一心想搵人結婚，

咁就小心果d嘆慢板嘅男生啦，

費事浪費大好青春。

對於好多姊妹黎講，

要佢地同「拖拉男」分手係好困難，

因為分左手又未必一定搵得返新男友，

但個男生又習慣左而家拍拖嘅相處模式，

真係唔知邊個先至係對方嘅「雞肋」，

分手唔敢，唔分手但又結唔到婚，

似乎兩樣都唔係自己想要嘅野。

老實講，用兩年去了解一個人係咪適合

自己嘅結婚對象，

真係好夠架啦，

奉勸各位身邊有個「拖拉男」嘅姊妹，

要同男朋友商量一下，

如果大家响結婚上未能取得共識，

就要認真思考一下大家係咪要繼續呢種關係。

不少愛情長跑多年嘅情侶，

最後雖然結左婚，

但不少响新婚1至2年內離婚，

原因係因為男方唔想做衰人，

覺得拖左女友7、8年，

連自己都唔好意思講分手，

咪唯有結婚囉，

但畢竟大家感情已經由濃轉淡，

結婚只屬略盡綿力完埋個故仔，

無人話結左婚唔離得婚架麻，

所以照擺「大龍鳳」，

當做完成左階段性責任，

之後理直氣壯咁離婚。

離婚再婚這回事，

從來對男人黎難度唔太高，

反而女人離婚再婚嘅成本好高，

請身邊有個「拖拉男」嘅姊妹，

無論之後係咪結婚，

都要小心三思而後行呀！

最重要係翻返去源頭，

看看妳地段感情有無問題。

Joe, 你的 Love Coach

男人心中的「靚女」

「我樣子一般，又真的遲了起步，該怎樣辦？」

相信這是一個不少年過40的女性，一直藏於心底的一個問號。上回說到男生都愛靚女，可能已經令不少女生唔高興，且慢！女生們不用馬上聯想娛樂圈中靚女如官欣娜、謝安琪……

對於自身條件一般，即處於中游位置的男生，他們所要求的靚女，其實並非「風頭躉」或「萬人迷」，男生對絕色佳麗一向抱只可遠觀的觀望態度，反而他們希望女友有以下特點，這樣就已經是他們心中的「靚女」：

1.     笑容甜美

2.     眼睛迷人明亮

3.     薄施脂粉

4.     髮型整齊時尚

5.     身材苗條

6.     姿態神情女性化

7.     衣著打扮時尚

男生看女生是從以上各方面去衡量而得到一個整體的印象，他們很少只打量你的臉孔五官。可惜不少熟齡女性會忽略外型打扮，可能大家在尋找感情的路上早已有點厭倦，往往很容易放鬆個人打扮 ，反而會要求男性降低對女性的要求，這似乎有點本末倒置。其中有幾項常犯地雷，熟齡姊妹實在不可不知：

1.     髮型：許多女性忽視髮型的重要，由於工作忙碌而鮮有打理頭髮，髮型長年保持不變，欠缺整理，髮絲蓬鬆，欠缺光采，如此這般都令男士卻步。一個修飾過的髮型能令你感覺年輕、時尚，最重要讓男生知道妳願意花時間照顧自己的儀容。

2.     身材：現時情況已經不是要求姊妹們身材出眾，而是不少女性的身型已經過胖，無錯，是過胖！當妳跟男生同行時，妳的身體比他要大出一個碼那種，這樣很難激起男生想保護照顧妳的想法，而且身型過胖也很難把衣服穿得好看，也會傾向選擇黑白藍灰等欠缺吸引力及熱情的衣服。

3.     姿態情神：熟齡姊妹由於生活經歷較豐富，不少在公司任高職，行事態度及作風早已比不少男性還要「男性化」，打扮當然是專業而傾向中性，談吐及神態一般較正經，由於習慣了這個模式，即使約會交友，仍然以對待工作的態度去對待男性朋友，這樣妳只會結識到視妳如「兄弟」的男生，卻不能令男性想追求妳。

4.     衣著：上班有上班服，約會有約會裝束，熟齡姊妹即使年紀稍大，在悉心打扮下仍然會明艷照人，可惜姊妹們一般只會在真的跟心儀男性約會才打扮，有些甚至連去飲喜酒都穿得像上班，實在很難吸引異性。有更甚者只穿褲子而不穿裙子，原因是行路唔方便！款式老土也很嚇人，因為已經不是年輕，衣服款式老土會令妳看起來年紀更大，對自己百害而無一利。

不少熟齡女性會抱怨工作已經很辛苦，哪有心機及時間去打扮？其實在各位姊妹的角度而言，這些原因似乎很合理。然而，妳因此而希望搵老婆的男性「體諒」妳卻實在是一種無理要求呢！

緊記：如果男生不能夠對大家的外表產生興趣，是很難進一步發掘大家的內在美。其實熟齡姊妹更要加把勁打扮自己，無論是否有人追，起碼自己打扮漂漂亮亮也是一件賞心樂事！

下一回：年紀唔輕，點算？

Terry，你的Love Coach

圖片來源：
Copyright: <a href='http://www.123rf.com/profile_samotrebizan'>samotrebizan / 123RF Stock Photo</a>

也說心動

近年香港樂壇猶如一池死水，

已經很少製作能夠引起話題，

反而大家都關注國內音樂節目《我是歌手3》，

是次有香港歌手古巨基參加，

重有星架坡國寶級歌手陳潔儀，

而陳潔儀重要係第2 round 出局，

令許多香港大跌眼鏡！

今次我唔係想談論陳潔儀被叮出局合唔合理，

而係因為佢被叮走，

令我好有趣興走去youtube 聽返佢選唱果首《心動》！

老實果句，我無聽過其他歌手唱成點，

但陳潔儀真係唱得委婉動人，

唱出左女性對舊愛的回憶，

及那份念念不忘嘅情懷！

不過，這種對舊愛久久不忘嘅「心動」，

聽起來係就係好浪漫嘅，

之但係如果真係發生响現實生活中，

有女仔將ex 放响心裡，

同佢雖然分左手，

但係你重好掛住佢，

比佢佔據你嘅心空間，

以致影响你以後同其他男生嘅發展，

咁就…… 一d 都唔浪漫囉！

歌詞最後話：

「 總是想再見你　還試著打探你消息

原來你就住在我的身體　守護我的回憶」

哇！老老實實，

女仔重想去打探自己個ex 消息，

响現實之中係好普遍。

其實要打探一d 都唔難，

尤其而家有facebook ，

大家又有common friends，

就一定會見相呀status 呀咁，

重會為到佢嘅post 而影响自己情緒。

我明白每個人失戀都要一段時間去過渡，

對舊愛仍然好留意係人之常情，

但如果當呢d 行為持續1年以上，

咁就真係要正視一下自己嘅情緒同埋心態啦！

點解自己會咁？

係因為唔捨得佢？餘情未了？

定係為左睇下佢有無新女？想乘機反tat ？

又或係怕佢比自己早結婚？

無論咩原因，

請小心處理及呵護自己嘅需要，

因為比一個已經唔在乎你嘅人繼續影响自己，

真係好唔抵同埋好無謂。

黎搵我處理感情問題嘅女仔，

佢地都會講下自己嘅戀愛史，

唔少女仔條件唔差，

但就係衰响個ex 手上：

ex 條件太好，女仔覺得以後遇上嘅男生都唔及佢、

比個ex 飛而感到自尊受害，覺得自己無人愛、

放唔低個ex ，仍然深愛對方而無法展開另一段感情、

認為愛情太苦、以後不敢入情關……

有時呢d 諗法會令d女仔响情路上一籌莫展，

不知不覺間錯過多少情緣、又虛渡多少青春？

人要向前看，

留在回憶之中會令你不能好好投入活在當下，

心動的一刻既已成過去，

享受過就好了，要走的就讓他走吧，

如能讓過去的經驗轉化為正能量，

幫助自己成為一個更好嘅人，

咁就已經無悔無憾啦！

Joe，你的Love Coach

男人都在搵什麼

當女生們都為著自己的終身幸福而著緊，正忙著如何提升自己的條件時，不妨從男生的角度思考一下，正所謂「知己知彼，百戰百勝」，這種態度也適用於愛情之上。

第一位：漂亮

外在美不單止是男生對女伴的要求，其實反之亦然，多少女生拒絕跟某某男生約會時，最普遍的原因都是嫌棄對方樣子「唔合眼緣」、「感覺唔係好夾」、「唔係我喜歡果type」等，我不是質疑大家的直覺，而是想解讀這些字眼背後的真正意思，不就是「唔夠靚仔」嗎？正所謂各花入各眼，男人眼中的「靚女」都有唔少類型，但大前提要「漂亮」是沒有讓步的餘地。妳可能會疑惑身邊一些不修邊幅、外型老古、不擅辭令的男生怎麼都繼續單身？妳以為只要是單身姊妹願意接受他們，他們便會照單全收？妳以為他們會根據自己的外貌降低自己的擇偶條件？那你實在太一廂情願了，也真的不了解男生的想法。現實是：無論男生自己的樣子有多不濟，他們會堅持等待「漂亮」的女生做女朋友。

這種側重追求「漂亮」的風氣在華人社會的情況是比較嚴重的，其實要明白也不怎樣困難。香港男生都愛面子，有個靚女友自然可以於社交圈子中Show off ，自己也忽然「升格」了。即使妳有多麼不認同這種英雄心作祟，連交女友都講呢D，但也要明白香港男生都似乎希望透過結識「靚女友」而獲得滿足的心理需要。

第二位：年輕

娶妻求年輕，這不是什麼新鮮的觀點，但不知怎的，姊妹們就是接受不了，口雖說明白男生的心態，但心中卻會埋怨男生只愛青春少艾。眾所周知孩子當然是趁嫩生，這個考慮大家不可不知。香港女生在工作與愛情之間，往往會選擇了先工作後愛情，求學時期（尤其大學階段）錯失物色結婚對象的時機，隨後便被忙碌的工作弄得沒有時間拍拖，於是一拖就10年8載，人到中年才醒覺自己的感情需要：原來自己如何熱愛工作都好，始終都想拍拖結婚生孩子。什麼？假如這是心聲，怎麼不一早就開始去搵？須知道年齡呢回事，不是妳說逆轉便逆轉，我就眼見不少姊妹因工作太辛苦，樣子殘之餘，臉上鮮有笑容，似乎趕客多點。

男生揀老婆其實比女生簡單，男生們的思路也是有跡可尋。既然男生喜歡漂亮女生係面子尤關，那麼同一邏輯之下，男生愛年輕女生也是可以理解。香港男生一般不太苛求女伴要懂讀心術，妳一知半解更好，他反而覺得應付妳是游刃有餘，乘機表現一下自己不是更好嗎？可惜香港女生都不太肯為男生提供舞台，愛情裡，有時妳越要贏就輸得越徹底。

其實對於男人擇偶的心態，女生並非完全無知，但少不免有點偏頗，許多時會選擇性接受。尤其是有信仰的女生，她們總是認為返教會的男生是例外，以為這些有信仰的男生對女生的要求較「不世俗」。

請捬心自問：妳希望遇上「例外」，是因為在妳的經驗裡，男生都不追求漂亮、年輕的女生？還是大家都有點自我，不想「迎合」男生的要求。有時甚至有點懶惰，搵得辛苦了，倒不如把精力放在工作，正所謂「一分耕耘，一分收穫」，似乎工作的回報比搵老公更實在、更可以控制喎！

不是說「漂亮、年輕」是鐵律，只是這兩項都是香港男生普遍的心態，加上現時社會男少女多，由於有得揀，男生們更不急於一時三刻，令他們更加堅持去等，等待終有一天搵到一位年輕貌美的女生。

有姊妹會問：我樣子一般，又真的遲了起步，該怎樣辦？　

這是一個很正面的問題，等我下回分解。

Terry

你的Love Coach


相片來源：
Copyright: <a href='http://www.123rf.com/profile_osons'>osons / 123RF Stock Photo</a>